Համացանցում տարածում են գտել սպամի ավելի զարգացած ու կատարելագործված հայերենով տարբերակները, որոնք մոլորության են մատնում բազմաթիվ օգտատերերի։ Կոնկրետ այս բլոգում կանդրադառնանք Ներքին գործերի նախարար Վահե Ղազարյանի անունով տարածվող սպամին։
Նամակը, որն ուղարկվում է օգտատերերին էլեկտրոնային փոստի միջոցով, իրենից ենթադրում է «դատական ծանուցագիր», որին կցված է ՆԳՆ Վահե Ղազարյանի ստորագրությամբ փաստաթուղթը՝ ՀՀ ոստիկանության գերբով, ՀՀ գերբով և դրոշով և Ինտերպոլի (միջազգային ոստիկանություն) տարբերանշանով։ Չնայած իր «լուրջ» տեսքին, նամակում առկա են հայերենի բացահայտ վրիպակներ, ուղղագրական, կետադրական սխալներ, որոնք հուշում են, որ այն արհեստական թարգմանություն է, և ամենայն հավանականությամբ, մշակված է ավտոմատ եղանակով, որին ստեղծման համար կարող է կիրառված լինել նաև արհեստական բանականությունը։ Մեկ այլ «մատնիչ» է համարվում նաև բովանդակությունում կիրառված գույների բազմազանությունը և Վահե Ղազարյանի լատինատառ ազգանվան սխալ տառադարձությունը՝ «Գազանյան»։
Այդուհանդերձ, շատ կարևոր է նման նամակներ ստանալիս այն մանրակրկտորեն ուսումնասիրել և սթափ դատողություն անել՝ վերլուծելով բովանդակությունը։ Օրինակ, օգտատերը, որը ստանում է նման նամակ, պետք է հասկանա՝ որքանո՞վ է նամակի բովանդակությունն առնչվում իրեն, արդյո՞ք այն խելամիտ է (այս նամակի դեպքում՝ պոռնոգրաֆիան, կիբեռպոռնոգրաֆիան, պեդոֆիլիան)։
Հորդորում ենք զերծ մնալ նման խաբեություններից, դուրս չգալ կոնտակտի ուղարկողի հետ և նման բովանդակությամբ նամակները նշել որպես սպամ։
Հեղինակ՝ Ալեքս Մարտիրոսյան
___________
Այս նյութը պատրաստվել է Բազմակողմանի տեղեկատվության ինստիտուտի կողմից, որը հնարավոր է դարձել Ամերիկայի ժողովրդի առատաձեռն աջակցությամբ՝ ԱՄՆ Միջազգային զարգացման գործակալության միջոցով իրականացվող «Հայաստանի մեդիայի զարգացման ծրագրի» շրջանակում: Ծրագիրն իրականացնում է Ինտերնյուս կազմակերպությունը՝ Մեդիա նախաձեռնությունների կենտրոնի, Երևանի մամուլի ակումբի և «Զինք» միջազգային կազմակերպության հետ համատեղ։
Նյութի բովանդակության համար պատասխանատու է միմիայն ծրագիրն իրականացնող կազմակերպությունը, և այն պարտադիր չէ, որ արտահայտի ԱՄՆ ՄԶԳ կամ ԱՄՆ կառավարության տեսակետները։